ਪਰ ਬਾਬਾ ਜੀ ਨੇ ਹਿੰਮਤ ਨਹੀਂ ਹਾਰੀ। ਹੌਲੀ-ਹੌਲੀ ਉਨ੍ਹਾਂ ਨੇ ਗੁਰੂ ਕਾ ਲੰਗਰ ਨਿਯਮਿਤ ਤੌਰ ’ਤੇ ਚਲਾਉਣਾ ਸ਼ੁਰੂ ਕਰ ਦਿੱਤਾ। ਬਾਬਾ ਜੀ ਰਾਤ ਨੂੰ ਲਗਭਗ ਬਾਰਾਂ ਵਜੇ ਉੱਠ ਕੇ ਸਪੀਕਰ ਲਗਾਉਂਦੇ ਅਤੇ ਨਿੱਤਨੇਮ ਆਰੰਭ ਕਰ ਦਿੰਦੇ ਸਨ। ਨਿੱਤਨੇਮ ਉਪਰੰਤ ਉਹ ਸ਼ਹੀਦੀ ਦੇਗ ਦੇ ਰਗੜੇ ਲਗਾਉਦੇਂ ਅਤੇ ਕੜਾਹ ਪ੍ਰਸ਼ਾਦ ਦੀ ਦੇਗ ਤਿਆਰ ਕਰਦੇ, ਅੰਮ੍ਰਿਤ ਵੇਲੇ ਆਸਾ ਦੀ ਵਾਰ ਦਾ ਕੀਰਤਨ ਕਰਦੇ ਅਤੇ ਉਪਰੰਤ ਸੰਗਤਾਂ ਨੂੰ ਕਥਾ-ਵਿਚਾਰਾਂ ਨਾਲ ਜੋੜਦੇ ਸਨ। ਸਵੇਰੇ ਲਗਭਗ 6 – ਸਾਢੇ 6 ਵਜੇ ਅਰਦਾਸ ਕਰਦੇ ਅਤੇ ਦੀਵਾਨਾ ਦੀ ਸਮਾਪਤੀ ਦੇ ਭੋਗ ਪਾਉਂਦੇ ਸਨ। ਸਮਾਪਤੀ ਤੋ ਬਾਅਦ ਉਹ ਆਪ ਹੀ ਲੰਗਰ ਤਿਆਰ ਕਰਦੇ, ਸੰਗਤਾਂ ਨੂੰ ਲੰਗਰ ਛਕਾਉਂਦੇ, ਜਲ-ਪਾਣੀ ਵਰਤਾਉਂਦੇ ਅਤੇ ਆਉਣ-ਜਾਣ ਵਾਲੀ ਸੰਗਤ ਦੀ ਸੇਵਾ ਕਰਦੇ ਸਨ।